برسلز۔13جون(اے پی پی):وزیر مملکت امور خارجہ حنا ربانی کھر بیلجیم دے جاری دورے دے دوران برسلز اچ یورپی یونین دے ݙو کمشنراں نال تفصیلی ملاقاتاں کیتن۔ دفتر خارجہ دے ترجمان دی طرفوں جاری بیان موجب وزیر مملکت دی یورپی کمشنر برائے کرائسز مینجمنٹ جینز لینارک نال ملاقات اچ پاکستان اچ یورپی یونین دی سیلاب متعلق امدادی سرگرمیاں تے ڳالھ مہاڑ تھئی ۔ وزیر مملکت ڳالھ مہاڑ دے دوران سیلاب دے بعد یورپی شہری تحفظ دے طریقہ کار کوں فعال کرݨ تے یورپی یونین دا شکریہ ادا کیتے جیں بحالی دے مرحلے دے دوران یورپی یونین دی طرفوں فوری مدد کوں ممکن بݨایا۔ فریقین ڈیزاسٹر مینجمنٹ اتے صلاحیت اچ تعاون کیتے مزید رستے ڳولݨ تے اتفاق کیتے۔ حنا ربانی کھر یورپی کمشنر برائے داخلہ امور یلوا جوہانسن دے نال ملاقات اچ ہݨے ہی شروع کیتے ڳئے مائیگریشن اینڈ موبلٹی ڈائیلاگ دے بہترین استعمال تے ڳالھ مہاڑ کیتی جیں اچ ہنر مند مزدوراں دی قانونی نقل مکانی دے مواقع وی شامل ہن۔ پاکستان۔ یورپی یونین ری ایڈمیشن معاہدے تے عمل درآمد اچ تعاون کوں تکڑا کرݨ تے اتفاق کیتا ڳئے ۔ یورپی یونین کمیشن اچ آپݨی ڳالھ مہاڑ اچ وزیر مملکت ایں امید دا اظہار کیتے جو یورپی یونین ابھردے ہوئے عالمی چیلنجز اتے غیر روایتی سلامتی دے خطرات بشمول موسمیاتی تبدیلی، وبائی امراض، پاݨی، توانائی اتے غذائی تحفظ نال نبݨݨ اچ قائدانہ کردار ادا نبھیسی ۔ انہاں پائیداری، گرین اکانومکس، زراعت اتے ڈیجیٹل کنیکٹیویٹی تے خصوصی توجہ اتے تعوان ودھاوݨ دی لوڑھ تے زر ݙتا۔
.jpg)
